Sinti un Roma sünd al siet Johrhunnerten in Europa tohuus. In de Länner, wo se herkaamt, gellt se as Minnerheiten, de sik vun de Geschicht her entwickelt hebbt, un de sik sülvst Sinti oder Roma nöömt. De Sinti leevt in West- un Middeleuropa, de Roma kaamt ut Oost- un Süüdoosteuropa. In all Länner, in de nich Düütsch snackt warrt, heet de ganze Minnerheit Roma. In Düütschland sünd Sinti un Roma siet 600 Johr tohuus.

Dat eerste Mal, dat se in en Oorkunn nöömt worrn sünd, dat weer 1407 in de Bischopsstadt Hilmesse Man taxeert, dat in Düütschland vundaag üm un bi 60.000 düütsche Sinti un 10.000 düütsche Roma leevt. Snacken doot se blangen Düütsch as twete Mudderspraak de Minnerheitenspraak Romanes. De düütschen Sinti un Roma finnt wi överall in ganz Düütschland.

In den Natschonalsotschalimus harrn de Sinti un Roma böös Kummer: De Nazis weern achter jüm ran un hebbt jüm ümbröcht – in Düütschland, in de Gegenden, de de Düütschen övernahmen hebbt un in de Staten, de op de Siet vun Hitler weren. Üm un bi 500.000 Sinti un Roma sünd dootmaakt worrn bi düssen Völkermoord na Plaan. Vun jümehr Kultur is veel twei slaan worrn.

De düütschen Sinti un Roma hebbt sik in ünnerscheedliche Verenen tohoop daan. Dat hölpt jüm, sik för jümehr Anliggen un jümehr Kultur stark to maken – so as in den Zentralraat vun de Düütschen Sinti un Roma e.V.

> Minderheitenspezifische Regelungen