Minnerheitensekretariat

Rechtliche Grundlagen

Europaraat mit de Euopääsch Minschenrechtskonventschoon (EMRK)

In Europa is de Europaraat mit de Europääsch Minschenrechtskonventschoon (EMRK) för den Schutz vun Minschenrechten un Minnerheiten heel wichtig. Anners as dat, wat politisch för de OSZE fastschreven is, hebbt de Regeln vun den Europaraat in de 47 Staaten, de dor Liddmaat sind, de Kraft vun Gesetzen. De internatschonale Organisatschoon arbeidt völkerrechtliche Verdrääg ut, de för vele Staaten gellt. Warrt de nich inhollen, kann jeedeen Börger den Europääschen Gerichtshoff (EGMR) in Straßborg anropen, de Europaraat passt also op, dat de Rechten ok würklich gellt. För den Schutz vun de Minnerheiten in Europa leist de EGMR en groten Bidrag. Wenn en Staat Liddmaat bi de Europääsch Union warrt, denn gellt siet Anfang vun de 1990er Johren: In dat natschonale Recht mutt dat al en „europääsch Minimum“ an Minnerheitenschutz geven. Dat is wichtig, denn all EU-Staaten hebbt den Verdrag vun de EMRK ünnerschreven, un de Konventschoon gellt för jüm. De EU sülvst mutt sik in ehr Doon noch nich an de Konventschoon hollen. Man in den Lissabon-Verdrag vun 2009 steiht binnen, dat de EU Liddmaat warrn will (Art. 6 (2) EUV).

De Europaraat hett de EMRK 1950 in Rom annahmen. 1953 is se Gesetz worrn. Dor höört en List mit de wichtigsten Grund- un Minschenrechten to. Rechten för Minnerheiten staht dor nich extra binnen, man liekers is för den Schutz vun Minnerheiten dat Diskriminerungsverbott na Art. 14 EMRK heel wichtig. Keeneen dröff slechter as annern behannelt warrn, wieldat he to en natschonale Minnerheit tohöört. Düsse Artikel gifft de Richt vör vun Art. 21 vun de Charta vun de Grundrechten vun de EU.

De Europaraat hett mit dat Rahmenövereenkamen to den Schutz vun natschonale Minnerheiten un mit de Europääsch Charta vun de Regionaal- oder Minnerheitenspraken de wichtigsten Warktüüch mit Rechtskraft in Europa op’n Disch leggt.

Dat Rahmenövereenkamen un de Sprakencharta boot openanner op: Dat Rahmenövereenkamen leggt den allgemenen politischen Rahmen fast. De Sprakencharta kickt vör allen op Spraak un Kultur.

Rahmenövereenkamen för den Schutz vun natschonale Minnerheiten

De Staaten, de bi den Europaraat Liddmaat sünd, hebbt sik dor 1993 ran maakt, en Rahmenövereenkamen för den Schutz vun natschonale Minnerheiten optosetten. An‘n 1. Februar 1995 weer dat Regelwark trecht för de Ünnerschrift. In Düütschland is dat 1998 Gesetz worrn. Keen Minsch schall Nadelen dorvun hebben, dat he en natschonale Minnerheit tohöört. Un nüms schall gegen sien Willen assimileert warrn. De Staaten erkennt de Plicht an, de Freeheitsrechten to schützen un de natschonalen Minnerheiten Stütt to geven. In Düütschland is dat Rahmenövereenkamen en Bunnsgesetz, dat steiht also höger as to’n Bispeel Lännergesetzen. 47 Staaten sünd opstunns Liddmaat bi den Europaraat, 39 vun jüm hebbt dat Rahmenövereenkamen annahmen, noch veer Staaten hebbt dat ratifizeert. Nich dorbi sünd jümmers noch Frankriek, Grekenland, Belgien, Monaco, Luxemborg, Andorra, Island un de Törkei (op den Stand vun 01/2017).

Düütschland hett den Verdrag mit utarbeidt un hett sik dorför insett, dat he gau op den Weg bröcht warrt. Denn dat is nich alleen wichtig, dat Plichten över dat Völkerrecht övernahmen warrt, ok de Afloop un de Rullen vun de Mitspelers mööt kloor ween, wenn de Staaten Plichten övernehmt.

So mööt de Staaten, de den Verdrag annehmt, in dat eerst Johr al den Europaraat Naricht geven, woans se dat Regelwark ümsett. Achteran mööt se all fief Johr Bericht geven.

En Raat geven Utschuss mit Fachlüüd vun buten hölpt den Europaraat, wenn he in de Länner nipp un nau henkieken will.

Hier geiht dat na de Berichten vun de Bunnsrepublik Düütschland

Hier geiht dat na de Berichten vun den Raat geven Utschuss un wat Düütschland dorto schrifft

Europääsch Charta vun de Regionaal- oder Minnerheitenspraken

De Europääsche Charta vun de Regionaal- oder Minnerheitenspraken will Spraken as Deel vun dat Kulturarv in Europa schützen un anschuven. Dat geiht üm so’n Regionaal- oder Minnerheitenspraken, de vun Huus ut in en Staat snackt warrt, de den Verdrag ünnerschreven hett. Dat geiht üm dat, wat bi düsse Themen maakt warrt: Bildung, hier vör allen dat Lehren vun de Spraak un in de Spraak, Gerichte un Amtsstuven, Medien, Kultur un dat wirtschaftliche un soziale Leven.

Nu is de Sprakencharta as „Menü“ opboot. Dat heet: de Staaten köönt bi de enkelten Themen ut mehrere Mööglichkeiten bi de Plichten utwählen. De Staat mütt sik op 35 Paragrafen oder Afsätz fastleggen, dor höört ok en Reeg Punkten mit to, an de he nich vörbikümmt.

Wenn dat dorüm geiht, de Sprakencharta in Düütschland ümtosetten, denn sünd vör allen de Länner tostännig, weniger de Bund. Dat hangt dormit tohoop, dat to’n Bispeel de Bildung in de Hand vun de Länner liggt. Ehrdat de Bunnsrepublik de Charta tekent hett, hebbt de Länner dorüm de Schangs kregen, dat se sik de Laag vun de Minnerheiten un Spraakgruppen nipp un nau bekiekt un passlich dorto denn enkelte Plichten övernehmt. Wat de Länner an Plichten annahmen hebbt, is nich överall datsülvige. Dat hangt af vun de Minnerheit oder Spraakgrupp.

De Charta hebbt se an’n 5. November 1992 in Straßborg opsett. Düütschland weer vun Anfang an dorbi un hett den Verdrag glieks an’n 5. November 1992 ünnerschreven. Dat dat en Gesetz warrn kunn, dorför müssen aver eerst fief Staaten de Charta ratifizeren. An’n 1. März 1998 weer dat sowiet, un vun den Dag op an gellt de Charta. Dat Gesetz över de Charta is vun den 9. Juli 1998, de Bunnsdag un ok de Bunnsraat hett dat annahmen. Siet den 1. Januar 1999 gellt dat. So as dat Rahmenövereenkamen is ok de Sprakencharta in Düütschland en Bunnsgesetz. Dat heet: dat steiht över dat Recht, wat vun den Rang her dor achter steiht - dat gellt ok för de Lannsgesetzen; un bi’t Tosamenspelen mit anner Bunnsgesetzen is de Charta grundsätzlich as dat speziellere Gesetz antowennen. Vun de 47 Staaten, de opstunns bi den Europaraat Liddmaat sünd, hebbt bet nu 25 Staaten de Charta annahmen, acht Staaten hebbt ehr blots tekent (Stand 01/2017).

Hier geiht dat na de Berichten vun de Bunnsrepublik Düütschland

Hier geiht dat na de Pröövberichten

Moin!

Wutrobnje witajće!

Hjertlig velkommen!

Latscho Diewes!

Hartlik wäljkiimen!

Witajśo k nam!

Herzlich Willkommen!

Welcome!

23.05.2019

Dänisches Jahrestreffen "Årsmøde" beginnt morgen

Mehr erfahren

23.05.2019

Stiftung für das sorbische Volk wählt Vorsitzende

Mehr erfahren