Minnerheitensekretariat

Rechtliche Grundlagen

Wat för politische Gremien gifft dat för Minnerheitenfragen?

De Beopdragte vun de Bunnsregerung för Utsiedlerfragen un natschonale Minnerheiten

Dat Amt vun den Beopdragten vun de Bunnsregerung för Utsiedlerfragen is 1988 inricht worrn. Dat höört to dat Bunnsbinnenministerium mit to. 2002 hett dat Amt ok den Opdrag för natschonale Minnerheiten kregen. An den 11.04.2018 hett Dr. Bernd Fabritius düt Amt övernahmen.

Mehr steiht hier

Raat geven Utschüss

Bi dat Bunnsbinnenministerium gifft dat düsse Raat geven Utschüss: för Fragen vun de däänsche Minnerheit, vun dat Sorbisch Volk, för de freesche Volksgrupp, för de düütschen Sinti un Roma un ok för de nedderdüütsche Spraakgrupp. Hier sitt de Vertreders vun de Minnerheiten un de Regionaalspraak mit de Bunnsregerung un den Düütschen Bunnsdag an een Disch. Vörsitter vun all düsse fief Utschüsse is de Beopdragte vun de Bunnsregerung för Utsiedlerfragen un natschonale Minnerheiten. Dat Minnerheitensekretariat is in all Beratende Utschüss as Gast op Duer mit dorbi. In de Geschäftsordnungen vun jeedeen enkelten Utschuss steiht binnen, wokeen dor noch binnen is.

Raat geven Utschuss för Fragen vun de däänsche Minnerheit

De Raat geven Utschuss is dor för all Fragen ut de bunnsdüütsche Binnenpolitik, de de däänsche Volksgrupp angaht. De Utschuss sekert af, dat sik de däänsche Minnerheit mit de Bunnsregerung un den Bunnsdag afsnacken kann.

Liddmaten sünd de Bunnsbinnenminister un en Staatssekretär ut dat Bunnsbinnenministerium, je twee Lüüd vun de Frakschonen vun den Düütschen Bunnsdag, dree Liddmaten vun de däänsche Minnerheit in Düütschland un för Sleswig-Holsteen de Minnerheitenbeopdragte vun’t Land. Vörsitter is de Beopdragte vun de Bunnsregerung för Utsiedlerfragen un natschonale Minnerheiten.

Raat geven Utschuss för Fragen vun de freesche Volksgrupp

De Raat geven Utschuss is dor för all Fragen ut de bunnsdüütsche Binnenpolitik, de de freesche Volksgrupp angaht.

Liddmaten sünd je een Vertreder vun den Frasche Rädj – Fresenraat Sekschoon Noord e. V., vun de Friisk Foriining, vun den Noordfreeschen Vereen un vun den Seelter Buund, dorto de Direkter vun dat Nordfriisk Instituut un ok Vertreders vun dat Bunnsbinnenministerium un vun de Regerungen in Neddersassen un Sleswig-Holsteen. Parlamentariers ut den Düütschen Bunnsdag un Vertreders vun anner Ministerien köönt to de Versammlungen inlaadt warrn. Vörsitter is de Beopdragte vun de Bunnsregerung för Utsiedlerfragen un natschonale Minnerheiten.

Raat geven Utschuss för Fragen vun dat sorbische Volk

De Raat geven Utschuss is dor för all Fragen ut de bunnsdüütsche Binnenpolitik, de de sorbische Volk angaht.

Liddmaten sünd dree Lüüd ut dat sorbische Volk, de schickt de Domowina in den Utschuss, denn een Vertreder vun de Stiftung för dat sorbische Volk, bavento Vertreders vun dat Bunnsbinnenministerium un vun de Regerungen in Brannenborg un Sachsen. Parlamentariers ut den Düütschen Bunnsdag un Vertreders vun anner Ministerien köönt to de Versammlungen inlaadt warrn. Vörsitter is de Beopdragte vun de Bunnsregerung för Utsiedlerfragen un natschonale Minnerheiten.

Raat geven Utschuss för Fragen vun de düütschen Sinti un Roma

De Raat geven Utschuss is dor för all Fragen ut de bunnsdüütsche Binnenpolitik, de de düütschen Sinti un de düütschen Roma angaht.

Liddmaten sünd twee Vertreders vun den Zentralraat vun de Düütschen Sinti un Roma, twee Vertreders vun de Sinti Allianz Düütschland e. V., een Vertreder vun dat Minnerheitensekretariat un bavento Vertreders vun dat Bunnsbinnenministerium, vun de Beopdragten vun de Bunnsregerung för Kultur un Medien un vun de Regerungen in all Bunnslänner. Parlamentariers ut den Düütschen Bunnsdag un Vertreders vun anner Ministerien köönt to de Versammlungen inlaadt warrn. Vörsitter vun den Utschuss is de Beopdragte vun de Bunnsregerung för Utsiedlerfragen un natschonale Minnerheiten. De Gründungsversammlung weer an’n 18. März 2015.

Raat geven Utschuss för Fragen vun de nedderdüütsche Spraakgrupp

De Raat geven Utschuss is dor för all Fragen ut de bunnsdüütsche Binnenpolitik, de de nedderdüütsche Spraakgrupp angaht.

Liddmaten sünd veer Vertreders vun den Bunnsraat för Nedderdüütsch. Mit dorbi sünd Vertreders vun dat Bunnsbinnenministerium un vun de Länner Brannenborg, Bremen, Hamborg, Mecklenborg-Vörpommern, Neddersassen, Nordrhein-Westfalen, Sachsen-Anholt un Sleswig-Holsteen. Parlamentariers ut den Düütschen Bunnsdag un Vertreders vun anner Ministerien köönt to de Versammlungen inlaadt warrn. Vörsitter is de Beopdragte vun de Bunnsregerung för Utsiedlerfragen un natschonale Minnerheiten.

Bund-Länner-Drapen mit de Minnerheiten to dat Rahmenövereenkamen to den Schutz vun natschonale Minnerheiten un to de Europääsche Sprakencharta (Implementerungskunferenzen)

Bi düsse Drapen geiht dat dorüm, woans dat Rahmenövereenkamen to den Schutz vun de natschonalen Minnerheiten vun den 1. Februar 1995 un de Europääsche Charta vun de Regionaal- oder Minnerheitenspraken vun den Europaraat vun den 5. November 1992 ümsett warrt. An den Disch sitt hier de Bunnsministerien, de to doon hebbt mit den Schutz vun Minnerheiten un de Regionaal- un Minnerheitenspraken, de Lannsbehörden, bi de in de Länner düsse Fragen tohooploopt, Vertreders vun de Dackverbänn vun de Minnerheiten un Spraakgruppen, de dör düsse Verdrääg schützt sünd, un wetenschopliche Inrichtungen vun jüm.

Länner-Bund-Referenten-Drapen Nedderdüütsch

Vun 2007 op an draapt sik eenmal in’t Johr Vertreders vun de Länner Brannenborg, Bremen, Hamborg, Mecklenborg-Vörpommern, Neddersassen, Nordrhein-Westfalen, Sachsen-Anholt, Sleswig-Holsteen un vun den Bund. Den Bunnsraat vun Nedderdüütsch haalt se mit an’n Disch. Dor warrt beraadt, wat in de enkelten Länner goot löppt, wenn dat üm de Laag vun Plattdüütsch vundaag geiht, un woans de Regionaalspraak beter op de Been kamen kann. Un dat mööglichst över de Lännergrenzen weg.

Gesprääksrunn natschonale Minnerheiten bi den Düütschen Bunnsdag

In de Gesprääksrunn, de Stütt kriggt vun den Vörsitter vun den Binnenutschuss, snackt en poor Mal in’t Johr Parlamentariers mit de Vertreders vun de Dackorganisatschonen vun de natschonalen Minnerheiten.

Moin!

Wutrobnje witajće!

Hjertlig velkommen!

Latscho Diewes!

Hartlik wäljkiimen!

Witajśo k nam!

Herzlich Willkommen!

Welcome!

23.05.2019

Dänisches Jahrestreffen "Årsmøde" beginnt morgen

Mehr erfahren

23.05.2019

Stiftung für das sorbische Volk wählt Vorsitzende

Mehr erfahren