Minnerheitensekretariat

Rechtliche Grundlagen

Regeln un Schreed vun de Bunnslänner för enkelte Minnerheiten

In dat düütsche un dat europääsche Recht gifft dat Regeln un Schreed, de för enkelte Minnerheiten gellt. In Düütschland steiht faken in en Lannsverfaten mehr över de Minnerheiten binnen as in dat Grundgesetz.

Däänsche Minnerheit

De Dänen warrt in de Lannsverfaten vun Sleswig-Holsteen utdrücklich schützt.

Stütt kriegt se ok vun dat Bonn-Kopenhagen-Protokoll. 1955 hebbt de Regerungen in Düütschland un Dänemark to Protokoll geven: Düütschland erkennt de däänsche Minnerheit, de in Düütschland leevt, an; to glieker Tiet erkennt Däänmark de düütsche Minnerheit an, de op sien Staatsgebiet leevt. In de Protokollen steiht binnen, dat dat jeedeen tosteiht, sik to en Minnerheit to bekennen oder ok nich (Freeheit vun’t Bekennen). Fasthollen warrt ok, dat för all Staatsbörgers desülvigen Rechten gellt. Beide Länner hebbt in en Extra-Protokoll fastleggt, dat se de Minnerheiten op jümehr Siet vun dat düütsch-däänsche Grenzland mit Geld Stütt geevt.

Dat Lannswahlgesetz vun Schleswig-Holsteen övernimmt ut dat Bunnswahlrecht de Punkten to’n Vördeel vun de Parteien vun de däänsche Minnerheit. Dat heet: De Fief-Perzent-Klausel, de regelt, dat bi Landdagswahlen blots de Parteien in’t Parlament rinkaamt, de nich weniger as 5 Perzent vun de Tweetstimmen kregen hebbt oder de in tominnst dree Wahlkreisen de Direktwahl wunnen hebbt, gellt nich för de Parteien vun de däänsche Minnerheit.

Fresen

De Fresen warrt vun de Lannsverfaten vun Sleswig-Holsteen utdrücklich schützt. 2004 hett de Landdag vun Sleswig-Holsteen bavento dat Freesch-Gesetz annahmen, dör dat Freesch schützt warrt un Stütt kriggt. Dor steiht binnen, dat de freeschen Spraakformen free bruukt warrn köönt, ok steiht dor wat vun de enkelten Rechten vun de Fresen, to’n Bispeel dat een Freesch in Amtssaken bruken oder Ortsschiller mit twee Spraken op opstellen kann.

Lausitzer Sorben

Dat de Sorben ütdrücklich schützt warrt, steiht eenmal in en Protokollnotiz to den Enigungsverdrag binnen, to’n annern in de Gesetzen vun de Länner Brannenborg un Sachsen, wo de Minnerheit to Huus is.

Sinti un Roma

As dat Land Sleswig-Holsteen in’n November 2012 sien Verfaten ännert hett, hebbt de düütschen Sinti un Roma dat eerste Mal in en Bunnsland jümehr egen Schutzrechten kregen.

In’n November 2013 hebbt de Ministerpräsident vun Baden-Württemberg un de Vörsitter vun den Lannsverband vun de Düütschen Sinti un Roma en Staatsverdrag ünnerschreven. Dor is kloor fastleggt, dat de Sinti un Roma ut Baden-Württemberg anerkennt warrt. Ok is dor de Oort vun Stütt fastleggt, op de sik de Minnerheit verlaten kann.

Anner öffentlich-rechtliche Verdrääg/Rahmenvereenbarungen gifft dat twüschen de Lannsregerungen un de Lannsverbänn vun de Düütschen Sinti un Roma in Rheinland-Pfalz, Hessen un Bremen. Vun de Oort is ok de „Gemeensame Erklärung“ in Bayern, dor hett de Landdag tostimmt, dat en Staatsverdrag uthannelt warrt.

Moin!

Wutrobnje witajće!

Hjertlig velkommen!

Latscho Diewes!

Hartlik wäljkiimen!

Witajśo k nam!

Herzlich Willkommen!

Welcome!

18.03.2019

Call for Papers: Sammelband "Funktionen der deutschen Nation"

Mehr erfahren

14.03.2019

Slowakischer Präsident Andrej Kiska erhält am 19. März 2019 in Brüssel den Europäischen Bürgerrechtspreis der Sinti und Roma

Mehr erfahren