Jü dånsch manerhäid

Jü gränse twasche Slaswig-Holstiinj än Dånsch as mååst ai tu mårken: Maning manschne snååke tjüsch än dånsch. Önj e norderjarn foon Tjüschlönj laawe taksiird ambai 50.000 manschne, wat tu e dånsche manerhäid hiire än en tjüschen påås hääwe. Gödj organisiirt san’s en bru tu üüsen näiber Dånsch.

Da booge for ålem önj e e stää bai e gränse, Flansborj, önj da krise Nordfraschlönj än Slaswig-Flansborj än önj di norddiilj foon e kris Rendsburg-Eckernförde. Jü dånsch manerhäid nåmt dåt, weer’s booge, Söödslaswig. Amkiirt laawet önj Nordslaswig önjt Dånsch en tjüsch manerhäid.

Ouerdåt dåt maning starke än äinstandi foriiniinge jeewt, koon e dånsch manerhäid jare wjarde än tradisjoone laawe. Di Sydslesvigsk Forening (SSF) – di söödslaswigsche feriin – as jare kulturel hoodforiining. Ma en äin partai, e Söödslaswiksche Wäälerferbånd (SSW), as e dånsch manerhäid tutids ma fjouer loondäismååns önj e loondäi fertrin. Sunt e bundesdäiwool 2021 as e SSW uk ma ån bundesdäismoon önj Berlin fertrin, wat ouers tu niinj fraksjoon hiirt.

“Europapolitiik as manerhäidepolitiik”

Jü dånsch manerhäid hålt deer wat foon, dåt enarken mansche fri ouer nasjoon än kultur önjtschiise koon. Jüdeer önjtschiising schölj åchted än schööld wårde as demookraatisch prinsiip önj tuhuupehång ma di roomeoueriinjkaamen for e schööl foon nasjonååle manerhäide än döör e europäisch spräkecharta. Sü säid e dånsch manerhäid: „Europapolitiik as manerhäidepolitiik än manerhäidepolitiik as Europapolitiik“.

> Minderheitenspezifische Regelungen