Över den Duum 60.000 Minschen billt vundaag dat sorbsche Volk. Se leevt blots in Düütschland, un twoors in de Oberlausitz (Friestaat Sassen) as Böversorben un in de Nedderlausitz (Land Brannenborg) as Neddersorben/Wenden.

Dat Volk vun de Sorben, vun’n Anfang her slaavsche Stämm ut den Noordoosten vun de Karpaten, keem vör üm un bi 1.500 Johr in dat Rebeet twüschen Oostsee un Erzbargen. In de Lausitz kunn dat sien kulturelle Egenoort över de Johrhunnerten to’n Deel wohren un vöranbringen – ünnerbraken hett dat de Politik vun de Natschonalsotschalisten. Dat gifft twee sorbsche Spraken: Böversorbsch un Neddersorbsch/Wendsch, wat bet vundaag in vele Familien un in’n Alldag snackt warrt. Man vör allen dat Neddersorbsche/Wendsche is in Gefohr, dat dat utstarven deit. Neven den Naam „Sorben“ bruukt man vör allen in Brannenborg ok dat öller Woort „Wenden“.

Düsse Naam geiht torüch op röömsche Geschichtsschrievers, de Stämm in’n Oosten, de se nich kennen deen, „Veneti“ nömen. Dor hett man in de düütsche Spraak naher „Wenden“ vun maakt.

De Domowina – Bund Lausitzer Sorben e.V. is de Dackverband vun all sorbschen Verenigungen. Politisch hangt de Verband vun keen un nix af. Dat weer 1902 as he grünnt worrn is; tohuus is he in Bautzen.

> Minderheitenspezifische Regelungen