Di frasche följksfloose önj Tjüschlönj laawet bait heef önj Slawig-Holstiinj än önjt norden foon Needersaksen än önj di kris Cloppenburg. Huum gungt deerfoon üt, dåt 60.000 manschne foon ja seelew miine, dåt ja frasche san.

Eefter deer, weer’s booge, hiitje ja Nord-, Ååst- än Saterfrasche. Da Nordfrasche san önj di eefter ja nåmde kris Nordfriesland än aw Hålilönj tu hüs. Da Ååstfrasche laawe önj da krise Aurich, Leer, Friesland und Wittmund, önj da krisfrie stääse Emden än Wilhelmshaven än önj diile foon da loonkrise Cuxhaven än Wesermarsch. Da Saterfrasche booge önjt nordweesten foon e loonkris Cloppenburg önj jü äinstandi gemiinde Saterlönj. Tu da frasche hiire uk da Weestfrasche, wat önj e Neederlönje as nasjonååle manerhäid önjerkånd san.

Jare foriininge seete jam deerfor in, u.o. dåt e spräke erhüülen blaft än öfentlik brükd wårt än dåt e kultuur önj da schoule baibroocht wårt.

E tåågeforiining foon da nordfrasche as e Frasche Rädj (Friesenrat, Sektion Nord e. V.), wat da geminsoome inträse foon da nordfrasche foriininge eefter büten än ouerfor oudere foriininge fertreet. Di Seelter Buund (Heimatverein Saterland) seet ham fort apruchthüüljen än e stipe foont seelterfrasch in. E Ååstfrasch Loonschap seet ham foon Auerk üt for e ååstfrasche spräke- än kultuurårbe in.

> Minderheitenspezifische Regelungen