Sinti än Roma laawe sunt iirhunerte önj Europa. Önj jare hiimstoun san da önj e luup foon e tid as manerhäide wöksen, wat jam seelew Sinti unti Roma nååme, weerbai Sinti da san, wat jare hiimstoun önj weest- än madeleuropa hääwe, än Roma di noome foon da önj ååst- än söödååsteuropa san. Bütefor foon deer, weer tjüsch snååked wårt, as Roma di noome for e hiil manerhäid.

Önj Tjüschlönj hääwe da Sinti än Roma sunt 600 iir jare hiimstoun. Dåt jarst tooch san ja 1407 önj e bischopstää Hildesheim aw en uurkunde nååmd. Huum gungt deerfoon üt, dåt önj Tjüschlönj diling ambai 60.000 tjüsche Sinti än trinambai 10.000 tjüsche Roma laawe. Ja snååke tjüsch än as tweed mamenspräke e manerhäidespräke Romanes. Da tjüsche Sinti än Roma laawe ålewäägens önj Tjüschlönj.

Önj e tid foon e nasjonåålsosiaalistisch gewålthiirschap wörden da Sinti än Roma ferfülid än as följk ambroocht – önj Tjüschlönj, önj da tjüsch beseete lönje än önj da stoote, wat ma Hitler ferbünen wjarn. Ambai 500.000 Sinti än Roma san oofer foon e rasedääsihäid foon da nazis wörden än foon jare süsteematisch ploonte följksmord; jare kultuurel iirw wörd tu en gruten diilj tuninte mååged.

Da tjüsche Sinti än Roma hääwe jam önj ünlike feriine tuhuupeslin, am jare interäse tu fertreesen än jare kultuur tu stipen – tuum biispaal önj di Sentråålrädj foon da tjüsche Sinti än Roma e.V.unti di Sinti Allianz Deutschland.

> Minderheitenspezifische Regelungen