Apjääften

Sowät dät Upperste, wät et Minderhaidensekretariat un die Minderhaidenräid touhope dwo, is et apkumen foar do ienheemske nationoale Minderhaiden un Foulkstrupele in Düütsklound. Deer heert tou, dät jo de Politiek in Düütsklound un in de Froamde ap Träid hoolde uur dän Koos, dät Fonsuun un do Gjuchte fon do Minderhaiden. Et is uk ne wichtige Apfjääfte, sik wied un sied mäd Ljude tou ferknätten, mintwain in de Politiek, in Buunde, in de Wietenskup un in de Prässe.

Ferwoardere, Buunde, Prässeljude, Wietenskupsljude un Wieshoaken, do Froagen uur of an Minderhaiden häbe, konnen biegunge un baal mäd dät Minderhaidensekretariat. Et rakt uk Wieten uur do Minderhaiden bekoand un tradt foar him ien.

Foar’t Minderhaidensekretariat is deerbie ju upperste Apjääfte, aalmantou Näis uur do Minderhaiden tou ferspreden. Dät Minderhaidensekretariat is uk bie n Masse näiskierige Fergoaderengen deerbie (mintwain: Gesprächskreis Nationale Minderheiten beim Innenausschusses des Deutschen Bundestages, Beratende Ausschüsse der Minderheiten beim Bundesministerium des Innern und für Heimat), lät sik sjo wan deer wät uutgjuchted is un rusted foar Gespräkke mäd Liede fonne Buundesdai, ju Buundesregierenge un ure grote Ljude inne Minderhaidenpolitiek.

Dit moaket dät Minderhaidensekretariat deerfoar:

• et hälpt Buunde fon do anärkoande Minderhaiden, do mäd dän Buundesdai,
  ju Buundesregierenge of dän Buundesräid uur hiere Seken bale wollen,

• et gungt ap Liede un Ploege fon n Buundesdai, ap Fraktionen, appe Regierenge un Ministerien tou,

• uum früündhooldend tou wezen un uur do Toachte fon do fjauer anärkoande Minderhaiden tou begjuchten,

• et rustet menelke Uutsoagen fon do Minderhaidenbuunde,

• et ferluchtet uur Seken, do mäd do Toalen, Kulturen un Politiek fon do Minderhaiden in Düütsklound tou dwoon häbe,

• et is foar do Minderhaidenbuunde Lid fon Kringe in Düütsklound un inne Froamde,

• weerniemend Lid in dän Bieräid fon ju “Antidiskriminierungsstelle des Bundes” (ADS),

• Lid foar do Minderhaidenbuunde bie do “OSZE-lmplementierungskoonferenzen zur Menschlichen Dimension”

• Anspreekpartner foar do skaujende Kringe fon dän Europaräid,

• et moaket de Skrieuweräi foar dän Minderhaidenräid.

Et Minderhaidensekretariat sit an de Englischen Straße 30, in Berlin. Et krigt Stöän fon’t Buundesministerium  foar’t Binnenlound un foar’t Heemlound. Die düütske Buundesdai hät dät so besleten.