Sintojo a Romojo su hižo lětstotki w Europje žiwi. W swojich domjacych krajach tworja woni historisce zrosćene mjeńšiny, kiž so sami Sintojo abo Romojo mjenuja, při čimž rěkaja w zapadnej a srjedźnej Europje bydlacy přisłušnicy mjeńšiny Sintojo, ći z južnowuchodoeuropskim pochadom pak Romojo. Zwonka němskeho rěčneho ruma so Roma jako mjeno za cyłu mjeńšinu wužiwa.

W Němskej su Sintojo a Romojo hižo 600 lět doma. Prěnjotnje naspomnichu so dokumentarisce 1407 w biskopskim měsće Hildesheim. Po trochowanjach bydla dźensa w Němskej něhdźe 60.000 němskich Sintow a něhdźe 10.000 němskich Romow. Nimo němčiny rěča woni jako druhu maćernu rěč mjeńšinowu rěč romowšćinu (romanes). Němscy Sintojo a Romojo su po cyłym zwjazkowym teritoriju žiwi.

Za čas nacionalsocialistiskeho namócneho knjejstwa běchu Sintojo a Romojo přesćěhanju a genocidej wustajeni – w Němskej, we wot Němcow wobsadźenych teritorijach a w zwjazkarskich statach Hitlera. Něhdźe 500.000 Sintow a Romow sta so z woporom rasoweho błuda a sytematisce planowaneho genocida. Jich kulturne herbstwo so z wulkeho dźěla zniči.

Přisłušnicy němskich Sintow a Romow organizowachu so za zastupnistwo swojich zajimow a za sylnjenje swojeje kultury w rozdźělnych towarstwach – kaž w Centralnej radźe Němskich Sintow a Romow z.t. abo wSinti Allianz Deutschland .

> mjeńšinospecifiske rjadowanja